Kokpit.az bildirir ki, avstraliyalı sürücü yay tətilindən əvvəlki ən az üç yarışda qırıq qabırğa ilə yarışıb. Gənc sürücü bildirib ki, o hətta Macarıstanda qırıq qabırğa ilə yarışıb və o formada karyerasının ilk yarışını qazanıb.
Oskar Piastri qırılma səbəbi olaraq oturacaqdakı sıxılma nöqtəsini görür: “Oturacağı təbii ki, ilin əvvəlində düzəldirsiniz və bəzən bir az səhv edirsiniz. Bəzi traslarda bu üzə çıxmır, amma məncə, Barselona, Avstriya, Silverstoun kimi çox çətin üç trasdan sonra bu hal üzə çıxmağa başladı.
Buna görə də kiçik təzyiqdən sonra qabırğamın dözümlülüyü itdi. Amma indi hər şey qaydasındadır və oturacağı dəyişdirdik. Demək olar ki, hər şeyi düzəltdik. Yəni ki, hər şey artıq qaydasına düşüb”.
Oskar Piastri qabırğasının qırıldığını Britaniya yarışından sonra öyrənib, ancaq düşünür ki, qırılma bir neçə yarış əvvəl baş verib: “Yoxlanış Silverstoundan bir gün sonra oldu, amma əminəm ki, qabırğam Silverstoun yarışından əvvəl qırılmışdı”.
Jurnalistlə Oskar Piastridən zədə ilə neçə yarışda mübarizə apardığı barədə soruşub. Avstraliyalı bu suala belə cavab verib: “Məncə, üç yarış. Lakin qətiliklə deyirəm ki, qırılma isə Avstriya yarışı ərəfələrində olub.
Məncə, Barselonada bir az narahat idi, amma Avstriyada ağrım çox artmışdı. Buna görə də bir neçə gün ərzində vəziyyətim çox pis oldu.
Ancaq bəzi şeyləri dəyişdirdik və bu dəyişikliklərdən sonra ağrı sürüş vaxtı belə yüngülləşdi. Buna görə də hər şey qaydasındadır”.
Oskar Piastri sonda əlavə edib ki, problemi dayandırmaq üçün fiziki cəhətdən əlindən heç nə gəlməyib, amma oturacaq dəyişdirildikdən sonra vəziyyəti yaxşılaşıb: “Məncə, oturacaqda nəyi dəyişdirəcəyimizi müəyyən etdik və bu dəyişiklikdən sonra qabırğamın qırılmasına baxmayaraq, ağrım çox azaldı.
Budapeşt və Spa traslarında yarışanda vəziyyətim pisə doğru getmirdi. Əslində vəziyyətim daha da yaxşılaşırdı”.
Şərh əlavə et