Kokpit.az xatırladır ki, ispaniyalı sürücü ilin sonunda Ferrari-dən ayrılacaq və onun Audi-yə keçmək ehtimalı yüksəkdir. Lakin İspaniya mətbuatının yaydığı xəbərə görə Sayns Audi layihəsinin gələcəyindən ümidli olmadığı üçün onların təklifini rədd edib və o, Mercedes və Red Bull variantlarını dəyərləndirir.
Karlos Sayns: “Xeyr, bu doğru deyil. Çıxan xəbərlər reallığı əks etdirmir. Daha əvvəl də dediyim kimi məndən asılı olmayan bəzi şeylər var və bir az gözləməliyik. Amma mən də tamamilə dayanmamışam. Hələ də insanlarla danışıqlar aparırıq, amma son qərarı vermək üçün bir az gözləmək lazımdır”.
Karlos Saynsın atası Karlos Sayns Senior Dakar Rallisində Audi-nin şərəfini qoruyur və o, almaniyalı avtomobil istehsalçısı ilə 2024-cü ildə əfsanəvi Dakar marafonunu qazanıb. Bu hal 30 yaşlı pilotun Audi-yə keçəcəyi iddialarını daha da artırıb.
Karlos Sayns: “Əlbəttə atam Audi haqqında, layihə haqqında və onların Formula 1-də tezliklə zirvəyə çıxacağı barədə həmişə yaxşı sözlər deyir. Volkswagen-in layihələrinə baxsanız görərsiniz ki, avtoidmanda daxil olduqları bütün kateqoriyalarda qalib gəliblər. Fərqi yoxdur, Audi, Volkswagen, Audi, Porsche hamısı iştirak etdikləri çempionatlarda çempion ola biliblər. Bu da vacib dəyərdir və diqqətə alınmalıdır. Amma mənim qərarımda daha çox faktor var.
Ümid edirəm ki, Audi gələcəkdə qələbələr uğrunda mübarizə aparar. Onlara uğurlar arzu edirəm”.
Keçən həftə Sauber komandası Niko Hülkenberiq gələn il üçün transfer etdi və almaniyalı sürücü 2025-ci ildə Sauber-in, 2026-cı ildən etibarən isə Audi-nin şərəfini qoruyacaq.
Karlos Sayns: “Doğru qərar verdiyimə əmin olmaq istəyirəm. Buna görə də uzun çəkir və son qərarı verməmişdən əvvəl seçimlərə baxmaq istəyirəm. Məncə, Nikonun Audi-yə keçməsi onlar və Niko üçün çox məntiqli qərardır. Niko əla pilotdur. Onun istedadını görmüşəm. Audi üçün əla seçimdir. Onları və Nikonu təbrik edirəm, çünki son vaxtlarda Haas-da əla çıxış edir”.
Şərh əlavə et