Azərbaycan-2023: Red Bull Bakıda qanadlandı!

Bakıda ilk dəfə sprint yarışının yeni formatı sınaqdan keçirilib. Əvvəlcə bu formatın Avstriyadan etibarən tətbiq ediləcəyi deyilsə də, həftənin əvvəlində qərar dəyişdirilib.

Cümə və şənbə günləri sürücülərə işləmək üçün ideal hava bəxş edib. Lakin yeganə sərbəst yürüş seansını sürücülər uzun müddətli qırmızı bayraqlara görə tam dəyərləndirə bilməyiblər.

F-1.az xatırladır ki, cümə günü baş tutan həftəsonunun yeganə məşqdinə Maks Ferstappen qalib olub. Həmin gün bu yarışın start düzümünü aydınlaşdıran əsas sıralanma turunun qalibi Red Bull sürücülərini üstələyən Şarl Lekler olub. Monakolu sürücü dünənki sprint yarışının sıralanma turunda da poulu əldə edib, lakin yarışda qələbə onu ötən Serxio Peresə gedib.

Loqan Sarcent sprint yarışını dünənki sıralanma turunda uğradığı qəzaya görə buraxmalı olub. Mexaniklər onun maşınını bugünə tam hazır vəziyyətə gətiriblər. Sprintin startında Corc Rassellə təmas yaşayan Maks Ferstappen zədəli maşınla yalnız üçüncü yeri tuta bilib.

Pirelli Bakıya ən yumşaq üçlüyü – C3, C4 və C5 tərkibləri gətirib. De Friz, Okon və Hlükenberq sərt, qalanları isə orta təkərlərlə yarışa başlayıb.

Yarışa Lekler və Ferstappen birinci cərgədən, Peres və Sayns ikinci, Həmilton və Alonso isə üçüncü cərgədən başlayıb. Qapalı park qaydalarını pozan Esteban Okon və Niko Hülkenberq pit-leyndən yarışa başlayıblar.

Startda liderlər qrupunda dəyişiklik olmayıb. Arxada Maqnussen Bottas çırpılaraq ön qanadını zədələyib, finlandiyalı sürücü isə xeyli yer itirib. 2-ci dövrədə ilk onluq: Lekler – Ferstappen – Perea – Sayns – Həmilton – Alonso – Stroll – Norris – Rassel – Tsunoda.

Maks dördüncü dövrədə Lekleri DRS ilə keçərək liderliyi ələ alıb. Şarl iki dövrə sonra da digər Red Bull sürücüsü Serxiodan geri qalıb və üçüncülüyə yuvarlanıb. Okon və Hülkenberq Qaslini keçiblər.

Bottas pit-stop dalğasını başladıb, onu Tsunoda, Piastri, Sarcent, Həmilton, Norris və Ferstappen izləyiblər. 11-ci dövrədə Nik de Frizin mexaniki problemi və altıncı döngədə divara toxunaraq dayanması sarı bayraqlara səbəb olub. Niderlandlı sürücünün maşınının ön asılqanı qırılıb. Bir qədər sonra TM trasa daxil olub və bu anda pit-stop edən sürücülər – Maqnussen, Peres, Lekler, Sayns, Alonso, Stroll, Rassell və Çjou üstünlük əldə ediblər. Peres liderliyə yüksəlib.

Pit yolunda əvvəlcə Rassell Strollu ötməyə çalışıb. Peresi isə komanda pitdən təhlükəli şəkildə buraxıb. Stüardlar hər iki insidenti araşdırıblar, lakin heç bir sürücü cəzalandırılmayıb.

Resrtardan sonra Ferstappen dərhal Lekleri ötüb, Sayns isə Alonso tərəfindən gözlənilməz yerdə keçilib. Həmilton Hülkenberqi üstələyib. 16-cı dövrədə ilk onluq: Peres – Ferstappen – Lekler – Alonso – Sayns – Stroll – Həmilton – Rassel – Okon – Hülkenberq.

Yarışın növbəti dövrələrində nəzərəçarpan əlamətdar hadisə baş verməyib. Strollun səhvindən istifadə edən Həmilton onu keçib. Britaniyalı sürücü uzun müddət Saynsı izləsə də, ona real hücum etmək imkanı olmayıb.

Yarışın sonlarına yaxın Red Bull sürücüləri və Alonso arasında sürətli dövrə mübarizəsi gedib, lakin son sözü Corc Rassell deyib – gəns sürücü əylənmədə səhvə yol verdikdən sonra Soft təkərlərə keçərək son turda əlavə bir xalı aktivinə yazdıra bilib. Hülkenberq və Okon yarışa başladıqları Hard təkərləri yalnız son dövrədə dəyişiblər.

Beləliklə, Serxio Peres mövsümdə ikinci, karyerasında 6-cı qələbəsini əldə edib. Çeko Bakıda ikinci qələbəsini əldə edə bilən ilk sürücü olub. O, Bakıdan ümumilikdə 33 xalla, komanda yoldaşı ilə arasındakı xal fərqini azaldaraq ayrılır. Maks Ferstappen ikinci olaraq komandasına növbəti dublu qazandırıb. Şarl Lekler isə mövsümdə ilk dəfə podiuma yüksəlib.

Mübarizənin davamı üçün çox gözləməli olmayacağıq. Gələn həftəsonu okeanın o tayında – Mayamidə bizi yenidən gərgin yarış gözləyir…

Sürətli dövrə: Corc Rassell (Mercedes) – 1:43.320  (51-ci dövrə, 208.566 km/saat

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

MÜHƏNDİSLƏR KUBOKU: